Curso de conversation in Interlingua/PARTE I Section 2 Scena 4

Strasbourg, in le officios de Marex Mundial: Petro e Catherina continua lor conversation. Illa etiam nunc essaya explicar a ille que il non ha alque in su officio. Petro deveni de plus in plus agitate, specialmente proque ille non pote trovar su cafetiera, que es su proprietate personal e que non pertine al compania.

Catherina suggere que ille parla con su chef, e ille lo face immediatemente postea, demandante que Catherina le attende. Catherina dice que illa non pote facer isto proque iste affaire probabilemente durara longe tempore. Al fin, illes concorda in reunir se un altere vice, a 4:00 in le postmeridie.

---

Petro: (Parlante a Franco in le telephono) Bon, vos nunc ha le numeros de telephono de duo agentias. Le duo ha un bon reputation. Multo ben, Franco. Multo ben. Si. A revider. (A Catherina) Excusa me pro tante demora. Io lo regretta multissimo.

Catherina: Non vos preoccupa. Il ha nulle importantia.

Petro: Que nos vade a mi officio.

Catherina: Ma, vostre officio non es ...

Petro: Non es que? Que vole vos dicer? Ubi es omne mi cosas?

Catherina: Io iva informar vos exactemente lo que io sape in tote ille cosa.

Petro: Mi officio es vacue.

Catherina: Si, exactemente.

Petro: Ma, que passa?

Catherina: Il habeva alcuno hic ante multe poc tempore.

Petro: Qui?

Catherina: Io non sape. Un obrero. Ille portava via toto.

Petro: Il es un surprisa.
Catherina: Il es forsan pro le projecto Geneva.

Petro: Ma io non comprende proque on portarea via toto sin dicer me alque antea?

Catherina: Ille vadeva via ante cinque minutas.

Petro: E mi cafetiera? Illo es mie, ille cafetiera. Illo non pertine al compania. Illo es mie.

Catherina: Illo forsan es foras, in le corridor.

Petro: Io spera que il es ver. Si io non lo trova, io irascera.

Catherina: Cerca in le corridor. Le obrero ha mittite toto in le corridor.

Petro: Il es ver. Ecce mi cosas. Mi sede, mi bureau. Illo anque es mie.

Catherina: Io non vide alcun cafetiera.

Petro: Oh, il va haber mal consequentias.

Catherina: Illo es illac?

Petro: No. Io non lo vide.

Catherina: Proque non parlar sur illo al chef del officio?

Petro: Il es exactemente lo que io va facer.

Catherina: Tote isto passava ante solmente dece minutas.

Petro: Ma como pote io travaliar? Nulle bureau, nulle tabula, nulle ... nulle.

Catherina (ridente): Nulle cafetiera.

Petro: Isto non es amusante de alcun maniera.

Catherina: Excusa me. Io non poteva prevenir me de rider.

Petro: Iste circumstantias non pote continuar. Io va vider Georgio immediatemente.

Catherina: Attende.

Petro: Ascolta. Vos pote attender un poco?

Catherina: No. Non vermente. Io ha multe cosas a facer.

Petro: Non pote vos attender un parve minuta? Isto essera sufficiente pro resolver tote isto.

Catherina: Ma io anque poterea perder troppo tempore multo facilemente.

Petro: Multo ben, forsan io poterea vider vos plus tarde, nonne?

Catherina: Le problema es que io ha arrangiate mi agenda pro vider vos hodie.

Petro: Ascolta, non potera vos esser hic un poco plus tarde? Forsan in un hora plus o minus?

Catherina: No. Ma forsan io poterea retornar al fin del postmeridie.

Petro: Isto esserea conveniente pro vos?

Catherina: Si, si. Multo ben.

Petro: Ben. Io va resolver tote isto immediatemente.

Catherina: Multo ben. Io comprende vostre problema.

Petro: Alora nos nos videra iste postmeridie. A que hora?

Catherina: Que nos dice verso quatro horas?

Petro: Quatro horas. Multo ben. Nos nos videra alora.

EXERCICIO 4: Confirmar e contradicer.

Guida: Povre Petro! Nulle bureau. Nulle idea de lo que passa. Io sape que ille ha resentimentos. Ma io volerea reaudir le manieras diverse de indicar que un persona ha ration o torto.

Illa: Isto es vostre officio?

Ille: Si. Isto es le mie.

Illa: Vos es le senior Johano Bosco?

Ille: Si, io es ille.

Illa: Vos cognosce mi nomine?

Ille: No. Io non lo cognosce. Attende. Vos es le secretaria temporanee?

Illa: No.

Ille: Vos travalia hic?

Illa: Si, io travalia hic.

Ille: Alora vos es le secretaria temporanee.

Illa: No.

Ille: Ma alora, qui es vos?

Illa: Esque vos es le senior Johano Bosco?

Ille: Si, io es ille.

Illa: E vos non me cognosce?

Ille: No. Io non vos cognosce.

Illa: Face un conjectura sur mi identitate.

Ille: Io crede que vos es un secretaria, e io pensa que vos es temporanee. Vos es un secretaria?

Illa: No. Io non es un secretaria.

Ille: Vos es temporanee?

Illa: No, de nulle maniera. Io non es secretaria temporanee.

Ille: Vos travalia hic?

Illa: Si, il es ver.

Ille: Vos travalia pro iste compania?

Illa: Si, vermente.

Ille: Vos travalia pro me in iste momento?

Illa: No, io non travalia pro vos.

Ille: Vos es mi nove assistente?

Illa: No, io non es vostre nove assistente.

Ille: Vos es mi nove secretaria?

Illa: No.

Ille: Alora io ha torto.

Illa: In illo vos ha ration.

Guida: Como le postmeridie jam ha venite, que nos retorna nunc a Petro e Catherina.